في الناس بتموت يادكتور أكرم.. بس ما بالكورونا!؟!


كتب وائل البابلي ..

منذ بداية الكورونا وانا متابع بحرص شديد الحاصل في المستشفيات والقطاعات الصحية الأخرى..
تبين لي بعد عدد من الحادثات المرتبطه بعملي كمتطوع ان كل المستشفيات لا تستقبل حالات مثل " غسيل الكلي - تغير دم - عمليات - بتر - وخلافه " بمسمي حالة باردة؟!  وان كل المستشفيات في حالة طوارئ ولا تستقبل الا الحالات الطارئة جداً !! ككورونا مثلاً !؟
الغريب ان معظم هذه الحالات التي تسمي باردة هي سبب رئيس للوفاة واليكم بعض ماكنت حاضراً وشاهداً عليه..

#اتصل بنا شخص من ام درمان على رقم مبادرة طارئ لمساعدته في ايجاد مستشفي عشان كراع والده في حالة يرثي لها وتحتاج لبتر فوري..  والده مصاب بمرض السكري وبالاساس تم بتر احدى القدمين مسبقاً .. الآن هو بحاجة لبتر الاخري ورائحتها لا تطاق وبدأت تسمم الجسم..
صدق عزيزي القارئ انه " لف " كل المستشفيات وما استقبله اي مستشفي بحجة الكورونا وقالوا ليهو انهم في استعداد طوارئ وان والده يستطيع الانتظار؟!

#صديقنا بالحي عندو خال محتاج لتغير دم طارئ حالته كانت متدهوره جداً .. ما استقبله اي مستشفي بسبب نفس الحجة وقالو ليهو امشي مستشفي الدعم السريع وفعلاً  هم فقط استقبله ولما جابو الاسعاف عشان ينقله للسلاح الطبي وافته المنية.  " ربنا يرحمو " .

وفي ناس كتييره متضررة وحصلة ليها مواقف اكعب بكتير من دي..

طيب..
بعد القصص دي لازم نسأل نفسنا اسئله...  ليه المستشفيات م تستقبل حالات ذي دي واللي هي ممكن تتعرض للموت ذي خال صاحبنا؟!
ايوه عارفين البلد فيها كورونا ووباء واي شي بس في الاخر بيظل المستشفي مستشفي والدكتور دكتور..
يعني م اجيك شايل زول لو ماغيرنا ليهو دمو حيموت تفحص لي الحرارة بجهاز كورونا وتقول لي م بستقبلك عشان انت حالة باردة؟!
هل هكذا كان قراركم ي دكتور أكرم؟!
الغريب ان بعض المستشفيات الخاصة تستقبل مثل هذه الحالات الحرجة وبمبالغ مادية قد لا يستطيع الدخلو محدود يتحملها..
يعني م ممكن الا اجيك مصاب بكورونا عشان تستقبلني.؟؟!
انتو دكاتره على شنو؟!
ول ماخدين الطب تجارة ووظيفة بالراتب؟!
الحاجة دي مفروض تتعالج في اقرب وقت..  وماتتحججو لينا بالكورونا عشان في دشليون طبيب في بلدنا دي وفي طلبة طب اتخرجو وقاعدين ساي منتظرين الامتياز..  استفيدو منهم للحالات الباردة..
الممرضات والممرضين بقدرو يتعاملو مع الحالات الباردة..
مفروض زول يصل المستشفي لازم يلقي الخدمة المحتاجها..  ياها الدول حولنا ناس بموتوا بالألوف وبرضو بيستقبلوا المرضي..
يا عالم في ناس متمسكة بقشة عشان لو ماتت اسرهم حتموت معاهم واقعياً ..
عمنا وخال صاحبنا الاتوفي اليوم بسبب عدم اسعافة مسؤوليتو في رقبة كل مستشفي م استقبلتو ومسؤوليتو في رقبة وزارة الصحة ودكتور اكرم..  وعمنا الكراعو مفروض تتبتر وبقت تسممو في جسمو برضو ذنبو في رقابكم.
يا وزير الصحة..  ما بغلبك تخصص في كل مستشفي دكتور وممرضين ع الاقل للحالات السريعه ذي دي..  بعدين ياخ ماكل حاله كورونا بتجي المستشفي بتكون عايزة جهاز تنفس او غسيل كلي او تغير دم او عملية عيون او غسيل معدة!!
الناس بتموت يا دكتور..؟
حتتصرف ول القصة مابتهمك كتير؟!

TAG

الاسم

بريد إلكتروني *

رسالة *

Dark mod